Galtesi Gorre Madaarino qaxxaramaanchi heeshshosi diri kotottote usurinni qorichishamanno gede gumulli.
Hawaasa፡ Birra 15/2017 M.D
Wodiidi Sidaami Zoone Aliidi seeru allaalshi seeru allaalaano shiqishshino qaxxaro xawissanno garinni qaxxaramaanchu Zelaalem Zedaagimi yaamamannohu 38 diro ikkannosihu Wodiidi Sidaami zoone Ciroone woradi Ciroone quchmi 01 ollii teessaanchi, reyituta galitesi Messelechi Turgamota sase ooso amanna shoolkiha godobbe settu aganinni noota barra 20/1/2016 M.D 3 osoosi galannowa agure galtesi kayinni hasaanbeemmori no yee kushiina masse hashshihunni 6:30 angase usure gorre shee daallasu woroonni madaarinota qaxxarote mazigawisi buuxisino.
Shiqqino qaxxaro xawissanno garinni qaxxaramaanchu galtesi shiihunni 10kita Barra 30/1/ 2016 M.D Ayidisera mare mininni fulte bainohu gede kule fiixu firu noowa hasiranni keeshshirono afira didandiino. Ledoteno taje afantannokki gede deisiisate Bansi F .M Raadooneranna addi addi konforaanse heedhuwa iyyahanni keeshshinota qaxxarote mazigawisi buuxisino.
Harunsanni keeshshinohu Wodiidi Sidaami Zoone aliidi seeru allaalshi taje xawissino garinni ikkitote aana huluullantino maate barra 6/5/2016 M.D Shiqishidhino ku'laatonni zoonennihu polisete biddishshi taje gamba assire zoonete aliidi yoo miniinni huluullamaanchu mine Qorqorate fajjote woraqata eenna barra15/7/2016 M.D minesi qorqqorri yannara huluullamaanchu 2kki soodo sidaamu qoqqowi polisete komishiinera mare anga uyinota shiqqino taje xawisino.
Barra 17/7/ 2016 M.D huluullamaanchu galteshi usure gorre shee kushiinaho 2 meetere woro qole balle ume madaarinota 7kki aganiinni fushsha dandiinoonni Zoonete aliidi seeru allaalshshi sooreessi kalaa Mulgeet Murihu huluullamaanchoho basente kisse fanne zoonete aliidi yoote minira sayiinsihu gedensaanni huluullammoonnihu aana ledonnita jawwaata buuxo assini yannara albaannino manni mine giirate jaddonni kassasame 2 dironna 6 agana usurame fulasino seeru allaalishshi buuxisino Jaddaaleessu Zelaalemi zedaagimihu loosino jaddora zoonete aliidi yoo minira kisse fanneenna yoote mini yekeersiisanni keeshshe ikkado mannu naqaashshenna tajenni buuxo asse jaddaaleessu shiqwinosi qaxxarora gargarooshshe shiqishiranno gede xa'misirono shiqishira dandiinokkihura hunaanchoho yiinosi
Zoonennihu Aliidi yoote mini doyichote chilooti Barra 15/02/2017 M.D irgaalamete hosinohura jaddaaleessu zelaalemi zedaagimihu 3 oososi amanna 8 agani godowinni noo galitesi hinaansetenni kae' e usure gorre shee madaarasinni itopiyu jaddote qorichi seeri kiiro 539/1A ra worroonni seeranna itopiyu jaddote qoricha murranni biddiissi 2/2006 deera 1 irkene 38te hundaanni worroonni wodho sae leellasinni jaddaaleessu zelaalem zedaagimihu heeshshosi diro wo'ma usurunni qorichishamanno gede gumule irgaalame seeru seejjo minira soyino. Gawajjamaancho Messelech Turgamote maate beettonsa ka'a hoogguro nafa yoote mini jaddaaleessaho uyiino gumulo hagiirsiissinonsata coyidhino.
Taje uyinonkehu፡ Wodiidi Sidaami zoone aliidi seeru allaalshi sooreessi kalaa Mulgeeti Muriho.
